Matthew 15

Anda Kouwᵾmᵾn Mbᵾ Nga Mbo Rondrᵾng Ik

1Wote, Jerusalem orunga wu Perisi kat kᵾn, Moses nga mi ik mbo wu kat kᵾn ok, Jisas waldᵾk, nᵾk mel, “Nim nga kitip kᵾni wu kᵾⱡ ndi, tᵾn nga anda kouwᵾmᵾn kᵾⱡ nga ik mbo endᵾtᵾng kᵾⱡ, tᵾk roi nduk, rᵾng nuing etᵾk, ki ⱡumᵾi rui narᵾk normin ei? Nambuⱡ emel etmin?” nᵾtᵾng. 3Nᵾtᵾng ni, Jisas ndi, punt ropa nimba mel, “Enim wote, Got nga mi ik ei, pep rui narᵾk, en enim nga anda kouwᵾmᵾn mbᵾ nga mi ik pep rormin. Ei nambuⱡ emel etmin? 4Wote, Got ndi nimba mel,

‘Nim nga manᵾm tipanᵾm raⱡ tᵾkᵾn ou ndui!’ Wote, ‘Wamp nam ti ndi, elim nga mam kep, tipam kᵾn kep, ik kit nᵾm ndam, wamp ei rok kundeing,’ nᵾtᵾm.
5Wote enim ndi, ik ti mel ku mbo endᵾk, wote wamp ti ndi, mam tipam raⱡ kundpa, mel ei ni enmbil nguⱡmba. Ei wote, tᵾp Got ngᵾnt ei ka nᵾtᵾm ndam, wote enim nga ik mbo endᵾtmin ei ndi, elim nga mam tipam raⱡ tᵾpa, rᵾpndi napᵾndrᵾm. Ik i etᵾk, mbo endᵾtmin mbᵾ ndi, Got nga mi ik ei, pep rui narᵾk, en enim nga ik mbᵾ mendpᵾⱡ pep rormin. 7Enim ik kol nga puⱡ wu mbᵾ ye! Enim nga puⱡ ei, unt painui wu Aisaiya ndi, ei mel nimba mot ndurum!

8‘Wamp mbᵾ ndi, na keta kᵾng ila, mbi mundᵾrmᵾn. Wote numan ei, na kᵾn roⱡ etpa tetᵾm. 9Na nga mbi paka rondᵾrmin uⱡ ei pendᵾk kileing. Ei nambuⱡ emel, mᵾi kona wamp nga mi ik mim etmin mbᵾ, mbo rondᵾk tᵾk, Got nga randᵾk etmin!” nitim.

Mel Mat Wamp Etpa Ⱡar Mondrum

10Wote, wamp minal morung nimbᵾ, wi ropa kundpa nimba mel, “Ik nᵾnt kᵾⱡ pilik kungᵾndᵾi! 11Wamp nga keta ila, mana purum mel mbᵾ ndi, wamp etpa ⱡar mundi namᵾndrᵾm. Wote, keta ila ekit orum mel mbᵾ ndi, wamp etpa ⱡar mondrum,” nitim.

12Wote, elim nga kitip kᵾni wu ni kᵾⱡ ndi ok, Jisas kundᵾk nᵾk mel, “Nim nga ik nᵾn ei ndi, Perisi wu kᵾⱡ pilik kit pᵾnmin ei, pᵾn muna mon nda?” nᵾtᵾng. 13Wote Jisas ndi, ik punt ropa nimba mel, “Na nga muⱡ kona Wuta ei ndi, kongun kona ila mel mat elim ndi, mbo rui nᵾrᵾrᵾm mbᵾ, elim ndi, nangga runggulk munding. 14Enim numan ou nduk pili nᵾpᵾlᵾi! Wu kᵾⱡ, rᵾp wu mong tᵾtᵾm kᵾⱡ, mong ti wu ti ndi, ti ki ambuⱡpa mepa purum ndam, raⱡ kunda kut ila mana pinggil,” nitim.

15Wote, Pita ei ndi, waldpa nimba mel, “Nim ik ek ron ei nga puⱡ ei, nᵾkᵾn mot ndui,” nitim. 16Wote Jisas ndi, nimba mel, “Enim ik ek ei nga puⱡ ei kep, pilik kun iti natᵾnmin ku ei? 17Wote kep, mel ti keta ila mana purum ei, mba kitim ila tepa, wote te raⱡpa omba ekit purum ei, enim pilik kun iti natᵾnmin ku ei? 18Wote, mel mat keta ila, ekit orum ei mundmong ila pepa orum mbᵾ ndi, wamp etpa ⱡar mondrum. 19Wote, wamp nga mundmong ila numan kit pepa ekit orum kᵾⱡ ndi, elinga wamp rok kondᵾk, kandᵾk kom pendᵾk, kindᵾp nok, ik kol rok, wamp mat kᵾn ik kit nᵾk, uⱡ kit mbᵾ etᵾk etmin. 20Got nga kuimp keta ila uⱡ kᵾⱡ ndi, wamp etpa ⱡar mondrum. Wote, rᵾng ti ki ⱡumᵾi rui narkᵾn nun uⱡ ei ndi, nim etpa kit mundi namᵾndᵾmba,” nitim.

Mondpa Pili Amp Ti Nga Timan

21Jisas murum kona ni, wak ropa mba kona peng Taiya kᵾn Sairon raⱡ nga, kona ᵾldᵾ tetᵾm mbila purum. 22Kona ila Keinen amp ti, ekit omba wi ropa nimba mel, “Nuim ye! Nim Depit nga kangᵾm ei, na kont kun ka! Na nga mbuⱡam ambuⱡa ei, kur kit rukᵾr orunga moⱡnga, ambuⱡa ei, etpa kit mondrum,” nitim.

23Ik nitim ni, Jisas ndi, ik ti punt rui nᵾrᵾrᵾm. Wote, elim nga kitip kᵾni wu ni kᵾⱡ ndi, ik mana tek nᵾk mel, “Kelpa pangga ni! Tᵾn pep ropa, ka etpa onum ei mon!” nᵾtᵾng. 24Ei kᵾn, Jisas ndi, punt ropa nimba mel, “Isrel wamp mbᵾ, kng sipsip mel tiki polk andᵾrmᵾn ei nga nimba, Got ndi, na tᵾpa mundrum,” nitim. 25I nitim ik ni, amp ni pilpa omba, Jisas nga kᵾmp puⱡ ila rumaⱡi pepa nimba mel, “Nuim ei! Na tᵾkᵾn rᵾpᵾndᵾn ka!” nitim. 26Wote Jisas ndi, ik punt ropa nimba mel, “Kangambuⱡa mbᵾ nga rᵾng mbᵾ tᵾpᵾn owa mbᵾ ngᵾmᵾn ndam, kapⱡa iti natᵾmba,” nitim. 27Amp ni ndi, “Nuim ye! Ik ei piram nᵾn ei wote, owa mbᵾ ndi, en enim nga puⱡ wu mbᵾ, rat pol ila molk, rᵾng noⱡina nurpᵾn, mana purum mbᵾ, tᵾk normin ku ni ka!” nitim. 28Wote Jisas ndi, nimba mel, “Nim nga mondpa pili ei, ronduⱡ purum kant ei kᵾn, nim nga numan ngᵾn uⱡ ei mel etmba,” nitim. Ni kᵾn mint, amp ei nga mbuⱡam nga kui ni wang nitim.

Jisas Ndi Kui Wamp Minal Etpa Titim

29Jisas murum kona ni, wak ropa omba, Num Galili ᵾldᵾ orung purum. Wote komnga tila oⱡa mba, muⱡ tᵾpa mana murum. 30Ila wamp minal ruk ok, wamp on por mul na, mong ti wamp na, ik ni nᵾni wamp na, elkᵾna rumbᵾⱡi wamp na, uⱡ elpa elpa itim wamp na nimbᵾ mek ok, Jisas nga kᵾmp puⱡ ila monduⱡnga, etpa titim. 31Wamp wei nimbᵾ, min ngᵾn minal mundrᵾng. Ei nambuⱡ emel, ik ni nᵾni wamp mbᵾ, ik nᵾtᵾng. Ki rumbᵾⱡi wamp omba kun purum. On por murum wamp mbᵾ, nombuⱡa andrᵾng. Mong ti wamp mbᵾ, kona kandrung. Isrel wamp nga Nuim Got ei nga mbi paka rondrᵾng.

Jisas Wamp 4000 Rᵾng Itim

32Wote Jisas ndi, kitip kᵾni wu ni kᵾⱡ wi ropa ruk tᵾpa nimba mel, “Na wamp mbᵾ nga kont enim. Ei nambuⱡ emel, na kᵾn moⱡina rumbᵾⱡ raldika omba pum. Ei nga akup, nuing mel ti tek muⱡi nambᵾrmᵾn. Kump kun pᵾi mang kona pᵾi, nint ndam, nombuⱡa mam paka ila kᵾmp kun ndi, kᵾmp ambuⱡmba ei mon,” nitim. 33Wote, kitip kᵾni wu ni kᵾⱡ ndi waldᵾk nᵾk mel, “Ya kona kui wak ila, rᵾng nant ila pem ei nga wamp rᵾⱡaip mam ei, rᵾng ambuⱡpᵾn kapⱡa indimin ei nga nᵾn?” nᵾtᵾng. 34Wote Jisas ndi, “Enim bret namba iti tek mormin?” nimba wuldᵾtᵾm. Ni kᵾn, wu kᵾⱡ ndi, punt rok nᵾk mel, “Bret 7 kat kᵾn oma kᵾralt tetᵾm ei ka!” nᵾtᵾng.

35I nilingina, Jisas ndi, wamp num ni pora, mana muⱡᵾi, nimba. Bret 7 ni kᵾⱡ kᵾn, oma ni kuraⱡ kᵾn tᵾpa ambuⱡpa, Got kᵾn angge nimba, puk ropa, elim nga kitip kᵾni wu ni kᵾⱡ ngurum. Wote wu ni kᵾⱡ ndi, mok rok wamp nimbᵾ ngorung. 37Wote, wamp morung nimbᵾ, pᵾkᵾ nok pilᵾng kunduⱡina, mana tᵾtᵾm mbᵾ, aprᵾk tᵾk kowa wal 7 mel rok peka rondrᵾng. 38Rᵾng norung ei, amp kangambuⱡa nimbᵾ, kᵾmp rui narᵾk wu mint kᵾmp rorung ei mba, 4,000 ei mel itim.

39Wote Jisas ndi, wamp nimbᵾ peing nimba mundpa, elim ni nu kanu ila omba, rukrᵾng mba, noi Makadan ni kona ila purum.